المدني

 المسطرة المدنية :

المسطرة المدنية هو واحد القانون شكلي إجرائي ، شنو زعما ؟ زعما اسيدي هو أن قواعد المسطرة المدنية ماكاتهضرش تماما على الحقوق الموضوعية ، مفهمتيش !! واخا ، القوانين جوج أنواع قوانين موضوعية بحال قانون الالتزامات و العقود و القانون الجنائي ، و قوانين إجرائية فحال قانون المسطرة المدنية و المسطرة الجنائية ؟ القوانين الاجرائية بحال المسطرة المدنية الهدف ديالا هي توريك كيفاش تجيب حقك أو ما يسمى "اللجوء إلى القضاء" ، القواعد د المسطرة المدنية كتنظم الدعوى المدنية ، شنو زعما !! الدعوى المدنية هي "وسيلة للجوء إلى القضاء للمطالبة بالحق " شتي اسيدي هانتا حقك كيضيع حدا عينيك و قانون الالتزامات و العقود يعطيك هذا الحق لكن كيفاش غادي تجيب حقك !!! باش تجيب حقك خاصك تتقدم بدعوى قدام القضاء و هاد الدعوى كاتنظمها المسطرة المدنية ، المسطرة المدنية كاتقول ليك كيفاش ترفع الدعوى ، و شمن محكمة خاسك ترفع عندها الدعوى و شنو خاسك تدير باش تثبت حقك قدام القاضي ، و كتقول ليك حتى مور ما يحكم ليك القاضي شنو خسك تدير باش تنفذ ديك الحكم ..