المسطرة المدنية بالدارجة المغربية

المسطرة المدنية ،

إلى مفهمتيش شيحاجة فهدشي لي غادي تقرا رجع للجزأ الأول لي بدينا فيه المسطرة المدنية غادي تلقاه لتحت 👇 .
المسطرة المدنية قولنا هو القانون الشكلي لي كيورينا كيفاش نجيبو حقنا عن طريق القضاء ، ملي شيحد كي ياخد ليك حقك ، خسك ترجع حقك عن طريق "الدعوى" ، أول خطوة هي نعرف شنو الطبيعة ديال هاد الدعوى لي خسني نرفع ، واش دعوى شخصية ، ولا عينية و لا مختلطة ،ماتخلعش راه غادي نشرحوهوم 😎 ، ملي كتسلف لشي حد 6000 درهم و ماكيبغيش يرجعها ليك و كيقول ليك و الله لا خديتيها ، نتا كتقرر ترفع دعوى اذن أول خطوة خسك تعرف الطبيعة ديال هاد الدعوى باش تعرف شمن محكمة غادي تمشي ، هادي دعوى شخصية ( حيت داك 6000 درهم حق شخصي ديالك ) كترفعها عند المحكمة الابتدائية لي جات فالمدينة أو الدائرة فين ساكن خونا لي سلفتيه ، الى نتا ساكن فكازا و هو ففاس ، خسك تمشي للابتدائية ديال فاس ماشي ديال كازا يعني "محكمة موطن المدعى عليه " طبقا للفصل 27 قانون المسطرة المدنية و هذا لي كنسميواه "الإختصاص المحلي" ، كتمشي لواحد البيرو فالمحكمة سميتو "كتابة الضبط" و كتحط واحد الضوسي سميتو "المقال الإفتتاحي" ( غادي نشرحو شناهو المقال الإفتتاحي و العناصر ديالو ) ،
إلى كنتي كتملك واحد الدار وجا واحد السيد قالك هادي داري و نوضتو تخاصمتو على الدار لي كتسما فالقانون "عقار" ، و بغيتي تمشي ن القضاء باش تفك هاد الحريرة خسك تمشي ترفع دعوى بنفس الطريقة ديال الدعوى لي قلنا قبيلة غير هو هاد الدعوى كاتسمى دعوى عينية عقارية حيت الصداع نايض على عقار ( يعني حق عيني ) ، و هاد الدعوى كيبت فيها 3 ديال القضاة ماشي قاضي واحد ، الى كنتي نتا الموطن ديالك فكازا و لي تعدى عليك فطنجة واش غتمشي ن "محكمة المدعى عليه " فحال الحالة السابقة ؟ لا لا كتمشي للمحكمة لي فالمدينة فين كاين الدار لي ناض عليها الصداع ، مثال : نتا ساكن فكازا و خونا فطنجة و الدار فتطوان اذن غادي ترفع دعوى فالابتدائية ديال تطوان يعني "محكمة موطن العقار " طبقا للفصل 28 قانون المسطرة المدنية ، الحلقة الجاية نكملو فين وقفنا 😎
ملاحظة : القضية لي كيبت فيها قاضي واحد كيتسمى القاضي المكلف بالقضية و الى كانو ثلاثة د القضاة كيتسمى القاضي المقرر .