القانون الجنائي و ما أدراك ما القانون الجنائي ، الإسم ديالو كيخلع بزاف ديال الناس ، لكن تيق بيا هذا هو القانون لي كيخلينا ما نعيشوش فالغابة و نضبطو السلوكات ديالنا و منخليوش القوي ياكل الضعيف .
القانون الجنائي ديال المغرب صدر سنة 1962 , و جاب ثورة جديدة فيما يتعلق بالتجريم و العقاب ، القانون الجنائي هو القانون لي كيوضح لينا شنو هي السلوكات لي كتعتبر جريمة و شنو هي العقوبة ديال هاد السلوك ، القانون الجنائي كينقسم لجوج ديال الأقسام ، القانون الجنائي العام و القانون الجنائي الخاص .
القانون الجنائي العام كيحدد لينا المبادئ العامة ديال 3 د الحوايج أساسية ، الاولى هي الجريمة و الثانية هي المجرم و الثالثة هي العقوبة ، و القانون الجنائي الخاص هو لي كيحدد كل جريمة بوحدها و الاركان ديالها و العقوبة ديالها ، مفهمتيش ؟ هانية سمع ، القانون الجنائي العام كيهضر بصفة عامة على السلوك فوقاش كيولي جريمة ، خسو يكون هاد السلوك ولا الفعل الجرمي فيه 3 ديال الأركان ، الركن الأول هو الركن المادي يعني الفعل الجرمي ( ضربتي شي حد بالقرطاس ) و النتيجة الإجرامية ( يعني داك خونا لي ضربتيه مات ) و العلاقة السببية ( يعني خونا مات بداك القرطاسة لي ضربتيه بها ماشي بشي حاجة أخرى ) ، هذا هو الركن المادي ديال الجريمة ، و لكن بوحدو ماكافيش ، خاس ضروري الركن القانوني ديال الجريمة ! شنو هو الركن القانوني ؟ الركن القانوني هو النص لي كيعاقب على السلوك ، الفعل إلى مكانش نص قانوني كيعاقب عليه صراحة ماكايكونش جريمة و كيكون فعل عادي مباح و هذا لي كنسميواه مبدأ الشرعية ، فحال نهار قال الخلفي غادي يدخلنا للحبس حيت مقاطعين ، غادي نجاوبوه بلي مايمكنش حيت ما درنا حتى جريمة و بالضبط حيت ماكاين حتى نص كيعاقب على المقاطعة إذن الفعل ديال المقاطعة ما فيهش ركن قانوني بالتالي غير تهلا اسي الخلفي .
و الركن الثالث ديال الجريمة هو الركن المعنوي ..
8
تعليقات
إرسال تعليق