الاسرة بالدارجة المغربية

، مدونة الأسرة : 

منذ الأواخر ديال القرن الماضي ارتفعت بزاااف ديال الأصوات الحقوقية باش نبدلو مدونة الأحوال الشخصية لي كانو بزاف ديال الحقوقيين كاينتاقدوها حيت كانت فيها مضامين كتنقص من قيمة المرأة على حسب الرجل على حساب ما كانو كيقولو ، فحال القضية ديال "الطاعة" و ديال "التعدد في الزوجات بدون قيد" و "الزواج بالقاصر" ، الشيء لي خلا المشرع يسمع ن هاد الأصوات  و خاصة منها النسائية و يحط مشروع ديال مدونة جديدة ديال الأسرة ف 2003 , إيوا بلا ما نعاودليكوم الصداع لي جابت معها هاد المدونة و خاصة من الجانب المحافظ لي قال أن المدونة جابت شي حوايج ماكاينينش فالشرع ، المهم داز داك الصداع و دخلت المدونة حيز التطبيق سنة 2004 , و زولنا مدونة الأحوال الشخصية ديال 1957 , الحقوقيين فرحو بهاد المدونة الجديدة و عتبروها قفزة تاريخية للتشريع المغربي ، المهم هذا كان تأطير ديال السياق لي جات فيه مدونة الأسرة ، هاد القانون فيه 400 مادة و مقسم ل 6 ديال الكتب ، الكتاب الأول كيهضر على الزواج ، و الكتاب الثاني على الطلاق الله يبعدو علينا و الكتاب الثالث على الولادة و نتائجها يعني داكشي ديال النسب ، و الكتاب الرابع على الأهلية و النيابة الشرعية يعني التأطير القانوني ديال تصرفات لي ناقص الأهلية و لي معندوش غاع الأهلية و شكون غادي ينوب على هاد الناس باش يكون التصرف القانوني ديالهوم صحيح و عندو أثر ، الكتاب الخامس كيهضر على الوصية و الكتاب السادس على الميراث أو اللعاقة لي كيخليوها الناس لي كايتوفاو رحمة الله عليهم ، حنا فالحلقات الجاية لي غادي نشرحو فيها مدونة الأسرة غادي نحيدو الكتاب الخامس و السادس حيت مسائل شرعية أكثر منها قانونية ، المدونة استندت على قواعد الفقه المالكي و جات لحماية الحقوق ديال المرأة و صيانة الكرامة ديال الرجل و ضمان الوضعية السليمة ديال الأطفال ، يعني باختصار الأسرة كاااااملة .